漱口水-HKPICKY

教你揀漱口水|漱口水教學 & 購買指南

用錯漱口水可能會令口腔問題加劇. 我哋為大家準備以下呢篇漱口水天書, 包括買漱口水嘅教學、購買tips同一定要注意嘅地方, 希望可以幫到各位揀啱漱口水, 徹底解決口腔問題嘅困擾.

漱口水購買Tips: 漱口水要按實際需要揀

揀漱口水嗰陣除左要買有ADA認證同避免買有酒精成份嘅漱口水(依兩點會喺下面詳細解釋)之外, 瞭解自己需要啲咩都好重要, 最緊要對症下藥先可以有效解決到口腔問題. 所以我哋準備左一系列FAQ, 希望可以幫到各位揀到最適合自己嘅漱口水啦.

1. 我有牙齒敏感問題, 應該揀咩類型嘅漱口水?
如果你有敏感牙齒問題, 或者成日生痱滋嘅朋友, 我哋建議你買標榜配方比較溫和嘅漱口水去避免進一步刺激已經受損嘅牙齒或者牙齦. 而經常受痱滋困擾嘅朋友可以嘗試下含有蘆薈同洋甘菊呢類具有舒緩作用嘅天然植物嘅漱口水, 可以暫時減低口腔內傷口帶嚟嘅痛楚.

2. 我好容易蛀牙或者好怕蛀牙, 應該揀咩類型嘅漱口水?
如果你嘅目標係預防蛀牙嘅話, 含氟嘅漱口水最適合你. 因為氟化身係一種天然礦物質, 呢類型嘅漱口水會係你嘅牙齒上面凝成一層保護膜以增強牙齒嘅琺瑯質, 加強牙齒對酸性同埋細菌的保護能力從而大大減低蛀牙嘅機會. 使用呢類漱口水之後記得確保避免飲食半個鐘頭, 唔係嘅話氟化物可能未停留足夠時間令到效果下降.

3. 我有口氣、牙齦發炎同牙菌膜積聚呢類問題, 應該揀咩類型嘅漱口水?
以上幾個口腔問題其實都同口腔內嘅細菌有好密切嘅關係, 一款標榜抗菌能力強嘅漱口水可以改善以上問題. 抗菌力強嘅漱口水唔單止可以改善口氣問題, 亦都可以幫助預防牙菌膜喺牙齦上面積聚導致發炎, 腫痛甚至出血. 買呢類漱口水嗰陣記得留意成份有無氯己定(Chlorhexidine), 如果長期使用嘅話有機會造成牙齒變色同埋影響味覺,所以最好喺醫生處方底下先至使用.

4. 如果我希望美白牙齒嘅話, 應該揀咩類型嘅漱口水?
首先, 以我地所知嘅資料, 暫時未有一款標榜美白牙齒嘅漱口水產品可以通過到美國牙醫學會(ADA)嘅功效同安全性認證, 所以呢類產品嘅實際功效存疑.

第二點, 呢類產品通常含有過氧化氫或者過氧化氫, 即俗稱嘅雙氧水. 呢類型嘅漱口水會引起牙齦和牙齒刺激, 令到口腔內組織受損最後導致口氣或者牙齦炎呢類問題惡化. 除非係處方漱口水, 所以我哋建議大家儘量避免市面上聲稱有美白功效嘅漱口水.

hkpicky-mouthwash-faq

漱口水購買Tips: 點解一定要揀有 ADA認證嘅漱口水?

揀漱口水嗰陣記得留意樽身有冇寫住 “ADA Accepted” 嘅標籤 , 如果有嘅話即係代表呢支漱口水通過左美國牙醫學會嘅有效性測試. 亦即係證明左嗰支漱口水聲稱嘅功效係真實嘅, 可以放心購買.

市面上尤其係香港有ADA認證嘅漱口水真係好罕見, 原因係, 要攞到呢個印章嘅門檻非常高. 廠商需要提供一系列嘅科學證明或者臨床研究數據去支持嗰件產品所聲稱嘅功效係真有其事嘅. 例如你枝漱口水聲稱可以24個鐘內抑制口腔異味嘅話, 廠商就需要提供臨床數據去證明, 然後再由美國牙醫學會(ADA)獨立嘅科學專家機構會對產品嘅安全性同埋有效性進行詳細同客觀嘅評估.

即使係最普通嘅漱口水都好, 製造商都必須證明嗰件產品係安全嘅, 唔會損壞口腔組織或引起任何口腔問題先會攞到ADA認證印章. 所以唔難理解, 好多大牌子都寧願駛錢去落廣告或者研發更多有噱頭嘅產品. 但站係我哋消費者嘅立場嚟講, ADA認證係一個最強而有力嘅保障. 就算個廣告講到件產品幾萬能都好, 都唔及一個有認受性嘅權威組織嘅認證.

漱口水購買Tips: 點解要避免有酒精成份嘅漱口水?

市面上其實好多好多漱口水為左令到產品功效更加顯著, 都含加入酒精成份去增強殺菌力. 除非係專業牙醫處方嘅藥用漱口水之外, 我哋唔推薦大家購買含有酒精成份嘅漱口水.

好諷刺嘅係: 喺漱口水加入酒精成份嘅原意係想殺死引致口臭嘅細菌同埋抑制佢地喺口腔入面嘅繁殖. 但呢類產品往往會降低口腔內嘅唾液分泌量, 而唾液中嘅氧氣正正係有抑制細菌嘅自然功效, 所以當口腔內嘅唾液水平下降嗰陣就會形成一個有利細菌生長同繁殖嘅環境, 最終反而導致口臭問題加劇.

再者, 漱口水入面嘅酒精會刺激口腔內嘅傷口、引起灼熱感、口乾嘅感覺同埋有機會令到牙齒根部變得脆弱, 增加牙齒敏感風險. 所以建議大家儘可能避含酒精成份嘅漱口水.

hkpicky-mouthwash-3

漱口水教學: 我無口腔問題困擾, 有無需要用漱口水呢?

漱口水可以稱為日常口腔護理步驟入面關鍵嘅一環, 因為漱口水可以覆蓋口腔內牙刷同牙線好難觸及嘅位置. 好多研究都證實咗每日使用漱口水可以有效治療口腔潰瘍、牙齦腫脹或口臭等口腔問題,有啲含氟化物嘅漱口水甚至可以做到增強牙齒琺瑯質, 預防蛀牙添.

無論你有無口臭、牙齦發炎或者牙肉腫痛呢類口腔問題困擾都好, 我哋都建議你每日利用漱口水配合刷牙同埋牙線去預防蛀牙同埋保持口腔清潔, 因為擁有一副整齊乾淨嘅牙齒同清新嘅口氣絕對可以令人對你留低一個良好印象.

漱口水教學: 小朋友可唔可以用漱口水?

根據美國牙醫學會指出, 除非有專業牙科專家嘅指導之下, 否則唔建議6歲以下嘅小朋友使用漱口水. 因為喺呢個年齡嘅小朋友嘅食道肌肉同埋吞嚥反射未必已經發展成熟, 好可能會喺漱口嘅過程中無意吞嚥左大量漱口水. 有一啲漱口水為左加強殺菌功效, 會喺配方到加入酒精成份. 如果小朋友吞入呢類漱口水就有機會引發噁心, 嘔吐甚至中毒徵狀.

漱口水教學: 使用漱口水嘅正確程序?

每支漱口水樽身上面都有使用方法, 但都係萬變不離其宗, 不外乎都係倒出建議嘅份跟住漱漱漱漱漱30秒左右然後吐翻出嚟, 相信大家都好熟悉㗎喇, 所以我哋喺下文會講多小小補充資訊俾各位參考.

正常嚟講, 漱口之後唔需要用清水再漱一次嘅, 尤其係含氟化物嘅漱口水需要喺口腔內組織上面停留超過30分鐘先可以發揮到最大嘅功效. 用完漱口水之後最需要吐出多餘嘅漱口水就可以喇. 食物同埋飲品都係同一道理, 所以漱完口之後30分鐘內最好都避免進食.

漱口之前應該刷左牙先, 其實一個完整嘅口腔護理程序應該係先刷牙, 再用牙線或者牙縫刷之後先至同漱口水. 為左達到最理想嘅效果, 我哋建議係使用漱口水之前應該先用牙刷同牙線清潔好牙齒入面嘅食物殘渣.

漱口水教學: 漱口水可唔可以代替刷牙?

漱口水係一種補充品, 佢同刷牙同牙線有相輔相成嘅關係. 漱口水可以覆蓋到牙刷清潔唔到嘅口腔區域, 而且可以根據唔同嘅需要去揀唔同類型嘅漱口水, 防蛀牙、抗口氣、抗菌、改善牙齦發炎諸如此類. 最緊要嘅係, 日常刷牙只可以清潔到口腔總面積嘅25%左右, 所以話漱口水佔口腔衛生好重要嘅一環.

漱口水都有佢自己嘅限制, 就係清潔唔到口入面嘅食物殘渣同比較大粒嘅牙垢. 所以刷牙、牙線同漱口水各自有各自嘅功效,好難只用其中一種代替其他.