hkpicky-external-hard-disk2

教你揀外置硬碟|外置硬碟 (External Hard Disk) 教學 & 購買指南

外置硬碟 (External Hard Disk) 嘅普及其實係必然嘅. 隨住科技嘅進步, 音樂、電影同相呢類媒體嘅質素越嚟越高, 所需要嘅儲存空間自然大咗; 同時我哋對於備份資料嘅意識高左, 一個可以攜帶出街, 方便工作隨時都用得到嘅大容量儲存裝置對於好多香港人嚟講幾乎已經成為左一樣必需品. 呢篇外置硬碟嘅天書會教大家揀外置硬碟嗰陣需要注意嘅事情, 購買指南同埋推薦幾款唔錯嘅外置硬碟方便大家做選擇, 希望可以幫到各位揀到啱心水嘅外置硬碟啦.

外置硬碟購買指南: 應該買幾大容量先啱?

揀外置硬碟 (External Hard Disk)嗰陣清楚知道要買幾大容量先符合自己嘅需要係好重要嘅一件事. 首先你要知道自己買呢樣嘢嘅係用嚟儲存咩類型嘅檔案. 例如你只係想普普通通咁Back up電腦入面嘅資料同埋方便應付一般工作需要嘅話, 咁買個1TB-2TB容量嘅應該已經夠用; 如果你需要儲存大量素材、高清電影、音樂或者相嘅話, 可能要買5TB或者以上嘅先至夠用.

隨著技術嘅成熟, 依類產品嘅容量將越嚟越大、尺寸越嚟越細、價錢越嚟越平. 依家市面上外置硬碟最大容量大約係16TB左右, 1TB、2TB、3TB同5TB都好常見而且唔同容量嘅價錢唔係真係差好多. 所以按自己需要去揀容量就可以, 金錢上負擔得起嘅話買個大小小嘅都唔怕, 反正都係想用一段長時間.

外置硬碟購買指南: 應該買HDD定SSD好?

外置硬碟嚟講, 固態硬碟(SSD)同傳統硬碟(HDD)都好常見, 因為佢哋嘅結構、技術、讀寫速度同價錢都完全唔同, 各有利弊. 所以跟住落嚟我哋會分析到底兩款產品各自適合邊類型嘅使用者.

毫無疑問SSD比起HDD嘅讀寫速度係快好多, 而且因為技術上更加先進嘅關係, 使用壽命比起HDD長好多. 但亦都係因為咁, SSD嘅價錢比HDD貴好多倍. 以2TB容量為例, 喺美國Amazon買一個2TB HDD大約係港幣450蚊左右, 而同樣儲存量嘅SSD就要港幣2,000蚊以上先買得到. 單純咁講儲存量嘅話, HDD其實好有優勢.

SSD比較適合處理繁重嘅任務, 例如剪片或者處理大量高清相片. 另一個情況係鐘意打機嘅朋友, 用SSD 可以大大提升遊戲體驗, 例如讀取地圖同埋加載速度都會快好多. 對於想加快工作效率或者享受下更加好嘅遊戲體驗而又捨得投資嘅朋友嚟講, SSD可能更加適合.

外置硬碟教學: 點解要買外置硬碟? 有咩用途同好處?

會考慮買外置硬碟 (External Hard Disk)嘅原因不外乎唔夠儲存空間用或者工作上需要. 跟住落嚟我哋詳細分析一下各種用途同埋好處, 大家就清楚知道外置硬碟對自己有無用喇.

擴展內部儲存空間
近年越嚟越多人都習慣使用手提電腦, 隨時隨地喺任何地方都可以做到嘢的確係非常方便. 但好多普通文書機嘅內置硬碟容量只係得256GB甚至128GB, 裝埋系統作業程式之後真係唔多夠用. 加上又唔係每個人都識得拆開部手提電腦換隻大容量嘅內置硬碟, 咁外置硬碟理所當然成為左加大電腦儲存空間嘅最佳選擇啦. 兩者價錢差唔多、細細部即插即用、由500GB到16TB都有任你揀、唔需要特別嘅電腦組裝知識, 真係超級方便, 亦都係外置硬碟可以普及嘅主要原因.

資料備份, 分散風險
定時將電腦內嘅資料Back up喺一個可靠嘅地方係一個好好嘅習慣. 因為你永遠唔知道部電腦幾時會無缘故死機、會唔會中左病毒有一日返到屋企發現開唔到機、唔知會唔會有一日唔小心倒瀉水整壞左部電腦令到所有資料無曬或者成部手提電腦漏咗喺車到搵唔返. 為左避免一次過唔見曬所有珍貴嘅資料例如相啊, 音樂, 私人文件或者公司檔案呢類重要資料嘅話, 定期備份電腦電話資料係好重要. 而外置硬碟因為容量大同傳輸速度快, 所以好勝任呢個工作.

工作用嘅暫存裝置
好多從事設計行業嘅朋友為左方便工作都會有返個外置硬碟作為一個暫存裝置咁用, 因為原生檔案或者素材嘅大細通常都好大, 用外置硬碟做一個暫存裝置嘅話可以方便管理檔案同將寶貴嘅內部儲存空間留返俾有價值嘅檔案用. 另外一個好處係避免左電腦因為儲存空間唔夠令到電腦變慢而拖慢工作效率, 好似Adobe Photoshop或者剪片工具呢類編輯器對系統性能都幾高要求, 電腦太慢嘅話工作效率真係會大打折扣.

方便攜帶, 即插即用
好多外置硬碟嘅賣點就係便攜性高, 即插即用. 意味住你無論去到邊, 喺無網絡同埋唔需要安裝驅動程序嘅情況下就可以攞到你需要嘅文件或者檔案. 另一個好處係你只需要一條USB線就可以同朋友或者同事分享數據同資料, 如果檔案比較大嘅話, 用Dropbox, Google Drive呢類雲端硬碟傳送嘅話可能需要好長時間, 相反, 用外置硬碟就會快好多.

間接增加電腦嘅壽命
一部電腦嘅操作系統需要檢測到內置硬碟先可以順利運行, 因為內置硬碟好多時都會預先安裝好多重要嘅系統程式同檔案, 所以對於一部電腦嚟講, 內置硬碟係必須品而外置硬碟就唔係必須. 換句說話嚟講, 如果內置硬碟壞左嘅話會直接令到你部電腦用唔到, 重新揀過、買過、裝過同安裝返系統都好浪費時間, 加上有一定風險唔見曬啲資料. 所以, 將外置硬碟作為主要嘅儲存空間去減低內置硬碟嘅讀寫密度去減低磨損率, 其實係間接咁增加左電腦嘅壽命.

外置硬碟教學: 有時見到轉速有分 5,400 RPM 同 7,200 RPM, 應該揀邊隻?

市面上消費級嘅HDD外置硬碟基本上分為磁盤旋轉速度5,400 RPM同埋7200 RPM兩種, 轉速快同慢會直接影響讀寫速度. 5400 RPM平均嘅讀寫速度係每秒12.5MB; 而7200 RPM嘅外置硬碟就可以去到每秒15MB. 就咁睇兩者嘅分別唔算太明顯. 除非你將會頻繁咁處理大量大型檔案, 唔係嘅話5,400 RPM嘅外置硬碟其實已經足夠應付大部份檔案傳輸嘅需求㗎喇.

5400 RPM另一個重要優勢係功率輸出低令到耗電量比較低, 對於成日要攞住部手提電腦出街做嘢無得經常插住火牛叉電嘅朋友尤其重要. 考慮埋兩者價錢上嘅差距之後, 5400 RPM理所當然成為一般消費者嘅首選啦.

外置硬碟教學: 外置硬碟嘅壽命有幾長? 點樣可以用耐啲?

撇除牌子、存放環境同埋人為損壞呢類外在因素, 一個HDD外置硬碟嘅正常壽命係3-5年左右. 跟住落嚟會教大家點樣妥當保存外置硬碟, 盡可能用得幾耐得幾耐.

最重要當然係要避免劇烈嘅碰撞. 因為呢類外置硬碟入面包含好多精密嘅活動零件, 佢嘅讀寫磁頭只係比磁盤高出1毫米, 所以呢類產品好怕受到激烈嘅碰撞. 所以我哋平時要儘量避免唔小心掉落地或者大大咁將佢哋掟向床或者檯面. 如果用緊嗰陣聽到有滴答滴答或者摩擦聲嘅話, 最好儘快Back up定啲資料先, 因為你個嘢好可能已經壞左喇.

環境因素對於產品壽命都有好大影響, 如果長期將外置硬碟擺係一個濕度高嘅環境, 好容易導致內部零件氧化甚至生鏽, 影響磁頭讀寫直接減低產品壽命. 如果你買左個轉數快 (7,200RPM或以上)嘅外置硬碟, 咁就需要留意下使用嘅環境有無足夠嘅散熱空間, 原理同所有電器一樣, 長時間使用又無足夠散熱嘅話都會有過熱嘅風險.

而固態硬碟(SSD), 高耐用性係佢哋其中一個賣點. SSD硬碟會喺讀寫過程之間將數據分配到整個存儲入面, 所有存儲單元都會得到盡可能嘅仔細處理. 再者, SSD喺使用一段長時間之後可以用”壞塊管理”嚟修復損壞的單元格, 有缺憾嘅儲存單元會被全新嘅備用單元取代, 只要保管得宜嘅話, SSD嘅壽命基本係無限嘅.

外置硬碟教學: USB 2.0, 3.0 & 3.1應該揀邊款?

USB係外置硬碟最常用嘅連接方法. 我哋經常見到好多唔同嘅產品都寫住USB 2.0、 3.0或者 3.1 Gen 1諸如此類. 但呢方面唔駛太擔心, 因為USB係一種向後兼容的傳輸標準. 意思即係比較新嘅USB 3.1可以兼容2.0, 只不過係傳輸速度會減慢以USB 2.0 嘅上限為止. 一般情況底下, 買HDD外置硬碟只需要確定嗰件產品支援到USB 3.1就已經好足夠. 因為大多數HDD外置硬碟都只係支持到呢個傳輸標準. 而SSD就可以支援到更加快嘅USB 3.1 Gen 2傳輸標準甚至更高嘅標準.

唯一要注意嘅係儘量唔好買只有USB 2.0嘅產品, 雖然USB 2.0仲係最普遍嘅標準, 但係科技進步得好快, 2.0好快會慢慢被淘汰. 市面上新型號嘅電腦通常已經升級埋做USB 3.1接口, 到時候反而俾2.0嘅外置硬碟拖慢左傳輸速度就唔好喇.

外置硬碟教學: 比起雲端硬碟, 外置硬碟有咩優勢呢?

好多時當我哋覺得需要額外儲存空間嗰陣都會攞埋雲端硬碟作為其中一個選擇. 市面上有好多雲端硬碟可以選擇, 例如 Drop Box, Icloud, Google Drive呢類產品, 的而且確佢哋係可以滿足到大部份一般用家嘅要求, 但係平心而論呢類雲端硬碟唔係完美嘅, 睇睇下例幾點你就會明白.

長用嘅話, 外置硬碟其實平過雲端硬碟
通常雲端硬碟都有免費嘅版本, 但係儲存量就好細嘅. 以Google Drive為例, 免費版本容量只係得15GB, 想加大嘅話要按每月收費, 假設你用2TB嘅Plan, 一年係6,200港幣, 除返開每個月510港幣左右. 外置硬碟嘅價錢比起一開始已經平左好多, 係Amazon俾500蚊已經買到牌子口碑唔錯嘅2TB外置硬碟慢慢任你用.

所以話, 外置硬碟係一開始俾多啲, 用得越耐成本就攤分得越低; 相反雲端硬碟就係一開始平, 但係用得越耐嘅話成本就越貴. 所以如果你打算搵儲存空間長期存放檔案嘅話, 我哋建議你買返部外置硬碟比較划算.

喺無網絡嘅情況底下, 外置硬碟比起雲端硬碟更加可靠
想像下係外國旅行嗰陣, 突然之間需要用到某啲資料, 而身處外地嘅我哋無辦法確保數據百分百可靠或者隨時可以搵到免費Wifi. 係依個時候外置硬碟 (External Hard Disk) 嘅即刻盡顯身價 – 淨係需要一條USB線就可以隨時攞到你想要嘅野, 而無需顧忌你身處何方同埋數據用量.

即使喺我哋熟悉嘅香港, 好多地方因為地形關係, 信號接收都好差. 二來唔係個個都用4G/ 4.5G無限數據上網Plan, 如果成日要用數據喺雲端硬碟Download大容量嘅野落黎用, 都幾肉赤㗎. 所以, 如果你唔希望係最需要嗰啲檔案嘅時候先發現上唔到網或者硬啃自己寶貴數據用量嘅話, 都係買返個外置硬碟比較好.

因為唔透過過互聯網傳輸資料, 所以外置硬碟理論上比較安全
外置硬碟同雲端硬碟其中一個最大嘅分別就係前者唔需要透過互聯網去傳輸資料; 而後者就要. 換句說話嚟講, 你儲存喺雲端硬碟嘅資料就多咗一重外泄嘅風險. 雖然Google, Apple呢類龍頭雲端硬碟服務供應商嘅保密工夫做得比較好, 但係數據指出, 好多時候資料被竊嘅原因都係因為黑客利用惡意程式同埋網絡釣魚詐騙而令到密碼被破解或者盜用導致損失. 要避免呢一類情況好大程度上都係需要使用者本身有一定嘅網絡防盜意識, 雲端硬碟服務供應商真係幫唔到幾多.

咁當然, 外置硬碟一樣都有機會被盜導致資料外泄嘅, 唔係絕對安全㗎. 所以揀用外置更碟定係雲端硬碟嗰陣要認真考慮埋以上嘅資訊再決定邊款最適合自己.

擺野係雲端硬碟, 資料使用權可能唔係淨係屬於你
你可能覺得儲存啲文件、檔案同相喺雲端硬碟, 我有權隨時存取, 咁嗰使用權一定淨係屬於自己㗎啦. 以下我哋指出嘅野可能好多人都會忽略左而且係超級重要嘅. 當你選用Google Drive服務之前, 需要同意一份許可協議以及條款和條件嘅聲明先可以繼續使用, 大家可以細心睇睇呢份聲明嘅內容:

“當您向我們的服務或通過我們的服務上載、提交、存儲、發送或接收內容時,即表示您授予Google使用、託管、存儲、複製、修改、創建派生作品、交流、發布、公開表演、公開展示和使用的全球許可. 分發此類內容。” “即使您停止使用我們的服務,該許可也會繼續。”

簡單嚟講, 雖然你上載嘅野仍然屬於你嘅, 但Google有權將你擺係雲端硬碟嘅資料無限期地使用, 即使將來你唔再用佢哋嘅服務. 而外置硬碟就無呢個問題, 可以講係一個重要嘅優勢.

外置硬碟教學: 內置硬碟 VS 外置硬碟

升級儲存空間嗰陣好多時都會考慮買內置硬碟同外置硬碟先啱. 雖然兩者嘅作用好似差唔多咁, 但其實兩者各有優勢, 所以係做決定之前最好瞭解下兩者嘅分別, 唔係嘅話可能好容易俾錯冤枉錢, 買完先發現唔啱自己嘅實際需要.

顧名思義, 內置硬碟係直接安裝喺電腦主機內部, 平時唔可以隨時拆開, 更換或者安裝新嘅內置硬碟嗰陣你需要拆開電腦機箱; 而外置硬碟就係用USB線直接連接電腦、電話或者平板電腦就搞掂, 亦唔需要好似內置硬碟咁, 要額外嘅供電源先可以運行到. 雖然兩者嘅作用大同小異, 論方便性又係外置硬碟贏曬咁濟. 但其實內置硬碟絕對唔係一無是處㗎, 正正因為佢需要拆開機箱先攞到同埋唔適合帶出街呢兩個特點, 大大減低左被盜同埋漏咗係條街嘅風險. 大頭蝦嘅朋友可能反而適合用內置硬碟喎.

到最重要嘅價錢方面, 如果要買一樣容量嘅話內置硬碟比起外置嘅貴好多㗎, 所以如果你只係純綷想加大儲存空間或者方便做嘢嘅話, 其實買個平平地嘅外置硬碟就已經足夠滿足到你嘅需要㗎喇.